Бүгін «Қазақ жол қозғалысы қауіпсіздігі ғылыми-зерттеу институты» ЖШС директоры Арыстан Масанов Мұхамеджан Тынышпаев атындағы ALT университетінің базасында өтіп жатқан Қытай мен Орталық Азия елдері арасындағы көлік саласындағы кадрларды даярлау жөніндегі Альянс Кеңесінің үшінші отырысында баяндама жасады. Іс-шара Қытай мен Орталық Азияның бес елінен келген университеттердің, мемлекеттік органдардың, ғылыми-зерттеу институттарының өкілдері мен көлік саласының сарапшыларын біріктірді. Отырыстың басты мақсаты - халықаралық ынтымақтастықты нығайту, тәжірибе алмасу және көлік саласында жоғары білікті кадрлар даярлаудың инновациялық тәсілдерін дамыту болды. Арыстан Масанов өз сөзінде Қазақстандағы жол қозғалысы қауіпсіздігі саласының жай-күйі мен даму перспективалары туралы баяндама ұсынып, ағымдағы жағдайға аналитикалық шолу жасады, негізгі сын-қатерлер мен үрдістерді атап өтті, сондай-ақ жол қозғалысы қауіпсіздігін арттыруға және көлік жүйесінің тұрақтылығына бағытталған ҚазЖҚҚҒЗИ зерттеулерінің нәтижелерімен бөлісті. Альянс Кеңесінің отырысына қатысу арқылы ҚазЖҚҚҒЗИ өңір елдері арасындағы халықаралық диалогты дамытуға және ғылыми-техникалық ынтымақтастықты ілгерілетуге, әсіресе көлік секторының тұрақты әрі қауіпсіз дамуы мәселелерінде елеулі үлес қосты.
